Inuusuttut Naalagaaffeqatigiinneq pillugu isummersuutaat
Ilisimasat misissuinerillu
Naalagaaffeqatigiinneq pillugu inuusuttut nipaat oqallinnermut ilannguttarpavut.
Naalagaaffeqatigiinneq pillugu inuusuttut isummersuutaat pillugit ilisimasat nutaat
Siullerpaamik Kalaallit Nunaanni, Savalimmiuni Danmarkimilu inuusuttut ataatsimoortumik misissueqqissaarnermi isumaannik aperineqarput. Tamatuma Atlantikup Avannaani inuusuttut imminnut qanoq isiginerannik siunissamilu sutigut ataatsimoorussaqassanersugut isumaannik immikkut ittumik paasinninnissamut periarfissiivoq.
- Misissueqqissaarnerup inerniliussai pingaarnerit
Soqutiginninneq annertooq, ilisimasaqarneq killilik
Naalagaaffeqatigiinnermi inuusuttut akunnerminni imminnut soqutiginnipput, amerlanerilli misigaat oqaatsit, kulturi inuiaqatigiillu pillugit ilisimasatik annikippallaartut. Kalaallit Nunaanni Savalimmiunilu inuusuttut Danmarki pillugu ilisimasaqarnerupput, Danmarkimi inuusuttut Kalaallit Nunaat Savalimmiullu pillugit ilisimasaqarnerannit.
Ilisimasaqannginneq ataatsimoornermut aporfiuvoq
Inuusuttut ikittuinnaat nunani allani inuusuttut peqatigalugit nukittuumik ataatsimoornermik misigisaqartut. Amerlasuut namminneq oqaatigaat imminnut ilisimasakippallaarneq qaninnerusumik attaveqarnermik misiginninnissamut aporfiusoq. Amerlanerussuteqartut isumaqarput ilisimasat amerlanerusut kiisalu nunat akimorlugit naapittarnerit ataatsimoornermik misiginninnerup nukittorsarneranut iluaqutaasinnaasut.
Naligiinnerulernissamik oqaloqatigiinnerunissamillu kissaateqarneq
Inuusuttut amerlanerussuteqartut Naalagaaffeqatigiinnermi suleqatigiinnerup attatiinnarneqarnissaa imaluunniit nukittorsarneqarnissaa kissaatigaat, amerlasuulli peqatigitillugu nutarterinissaq pisariaqartoq isumaqarput. Inuusuttut naligiinnerunissamik, oqaloqatigiinnerulernissamik kiisalu nunat ataatsimoorussaat ukkatarineqarnerunissaannik pisariaqartitsisoqartoq tikkuarpaat.
Isummiutiinnartakkat suli initupput
Ingammik kalaallit savalimmiormiullu inuusuttaasa isummiutiinnakkanik isiginnittaaseqarneq naapertorlugu tunngavigalugit pineqartarlutik misigisarpaat. Amerlasuut tikkuarpaat ilisimasaqarnerulernissaq, ilinniartitsinerup pitsaanerulernissaa kiisalu tusagassiuutit assigiinngisitaarnerusumik saqqummiisarnerisa isummiutiinakkanut iluaqutaasinnaasut.
Ataani nalunaarusiat atuarnerisigut annertunerusumik paasisaqarit
Misissuinivut
- Epinion suleqatigalugu inuusuttut Naalagaaffeqatigiinneq pillugu ilisimasaat, soqutigisaat, imminnut qanoq isiginerat, ataatsimoornermik misigisaat kiisalu Naalagaaffeqatigiinnerup siunissaa pillugu isummersuutaat misissuiffigaagut.
-
Misissuinerput kisitsisit tunngavigalugit apeqqutit akissutaat (kvantitativ) kiisalu oqaloqatigiilluni qanimut apersuinerit (kvalitativ) tunngavigalugit ingerlanneqarpoq. Peqataasut tassaapput Kalaallit Nunaanni, Savalimmiuni Danmarkimilu inuusuttut
18-it 28-llu akornanni ukiullit.